Gakenke: Mutimawurugo yashimiwe uruhare mu kubaka imiryango ishoboye kandi itekanye
Ku wa 19 Kanama 2026, Mu Karere ka Gakenke habaye Inteko Rusange y’Inama y’Igihugu y’Abagore ku rwego rw’Akarere, yitabiriwe n’abahagarariye abagore mu nzego zitandukanye, igamije gusuzuma uruhare rwa Mutimawurugo mu kubaka umuryango ushoboye kandi utekanye.
Iyi Nteko Rusange yabaye ku nsanganyamatsiko igira iti: “Uruhare rwa Mutimawurugo mu kubaka umuryango ushoboye kandi utekanye,” hibandwa ku nshingano n’ibikorwa Mutimawurugo asabwa gushyiramo imbaraga, birimo guhangana n’ubukene, kurwanya imirire mibi n’igwingira, guteza imbere isuku n’isukura, gukumira guta ishuri kw’abana, kurwanya ihohotera rishingiye ku gitsina no gukemura amakimbirane yo mu muryango.
Ibikorwa byagezweho
Mu Nteko Rusange, hagaragajwe ibikorwa byakozwe n’Inama y’Igihugu y’Abagore mu Karere ka Gakenke bigamije guteza imbere imibereho n’ubushobozi bw’abagore n’imiryango.
Muri byo harimo imiryango 3,871 yahujwe n’ibigo by’imari, mu gihe imiryango 2,845 yatangiye gukoresha serivisi z’ikoranabuhanga mu kubitsa no kubikuza amafaranga. Indi miryango 3,751 yizigamira mu matsinda kandi ikoresha serivisi za Mobile Money mu guhererekanya amafaranga.
Mu rwego rwo guteza imbere kwihangira imirimo, abangavu babyaye 476 bahawe imashini zidoda zibafasha kwinjira mu bikorwa bibyara inyungu. Abagore n’abakobwa 2,924 na bo bakanguriwe kwiga imyuga n’ubumenyi ngiro, binyuze mu bigo 22 bitanga aya mahugurwa, mu gihe abagore 1,587 bihangiye imirimo iciriritse.
Hanagaragajwe ko abagore bahawe ubushobozi binyuze mu bikorwa by’ubworozi, aho hatanzwe inka 217, ihene 692 n’ingurube 1,062, mu rwego rwo kubafasha kwivana mu bukene no guteza imbere imibereho y’imiryango yabo.
Ku bijyanye no guteza imbere imiyoborere y’imari, abagore 472 bakanguriwe kwaka inguzanyo mu bigo by’imari, bagaragaza ubushobozi bwo kwishyura neza, mu gihe abagore 613 bahuguwe ku ishoramari no guhanga imirimo.
Ikoranabuhanga na ryo ryagarutsweho nk’umuyoboro wo guteza imbere imari y’abagore, aho abagore 28,205 bahuguwe kandi bafungura konti za Mobile Money.
Isuku n’imibereho myiza
Mu rwego rwo guteza imbere isuku n’isukura, hubatswe ubwiherero 3,478 bwujuje ibisabwa. Hanatanzwe matela 17,814 muri gahunda ya Sasa Neza, binyuze mu matsinda 512 yashinzwe.
Muri iyi Nteko Rusange, hanaganiriwe ku bikorwa biteganyijwe gukorwa na Mutimawurugo, hibandwa ku gukomeza kugira uruhare mu gukemura ibibazo bibangamiye umutekano n’imibereho myiza y’imiryango.
Hatanzwe kandi ibiganiro byibanze ku gukumira ihohotera mu muryango, gukemura amakimbirane mu buryo bwubaka ndetse no gukumira ikoreshwa n’icuruzwa ry’ibinyobwa bitujuje ubuziranenge, nk’imwe mu nzira zo kurinda ubuzima n’umutekano w’abagize umuryango.
Iyi Nteko Rusange yasojwe hibutswa ko Mutimawurugo afite uruhare rukomeye mu kubaka umuryango ushoboye, ufite ubuzima bwiza kandi utekanye, bityo ko imbaraga zashyirwa mu bukungu bw’umuryango, uburezi bw’abana, isuku, uburinganire n’umutekano w’umuryango zigomba gukomeza kongerwa.