Gakenke: Hatashywe uburyo bwo guteka hakoreshejwe Gaz mu mashuri hagamijwe kubungabunga ibidukikije
Kuri uyu wa 28 Nyakanga 2026, mu Kigo cy'Amashuri cya Lycée Saint Jérôme Janja mu Karere ka Gakenke, habereye igikorwa cyo gutaha ku mugaragaro uburyo bwo guteka hakoreshejwe Gaz (LPG), mu rwego rwo kubungabunga amashyamba no kurengera ibidukikije.
Iki gikorwa cyitabiriwe n'Umuyobozi w'Akarere ka Gakenke, Madamu Mukandayisenga Vestine, Ambasaderi w'u Buyapani mu Rwanda, Kazuya Nakajo, abahagarariye Minisiteri y'Uburezi, Minisiteri y'Ibidukikije, Ikigo cy'Igihugu gishinzwe Kubungabunga Ibidukikije (REMA), DUHAMIC-ADRI, Ishami ry'Umuryango w'Abibumbye ryita ku Bimukira (IOM), abahagarariye inzego z'umutekano, Visi Meya ushinzwe Imibereho Myiza y'Abaturage mu Karere ka Musanze
ndetse n'abandi bayobozi n'abafatanyabikorwa. Uyu mushinga ushyirwa mu bikorwa na ku bufatanye bwa Duhmic Adri na IOM Rwanda
, ku nkunga ya Guverinoma y'u Buyapani, ugamije guteza imbere ikoreshwa ry'ingufu zisubira mu bigo by'amashuri, mu rwego rwo kugabanya ikoreshwa ry'inkwi mu guteka no kubungabunga ibidukikije.
Binyuze muri iyi gahunda hubatswe ibigega bya Gaz mu bigo by'amashuri birindwi byo mu Turere twa Gakenke na Musanze, ari byo GS Saint Jérôme Janja, APICUR, MIPC, École des Sciences de Musanze, TSS Nemba, Janja TVET na ES Nyarutovu. Umuyobozi w'Akarere ka Gakenke, yashimiye Guverinoma y'u Buyapani, IOM n'abafatanyabikorwa bose bagize uruhare muri uyu mushinga.
Yagaragaje ko ikoreshwa rya Gaz mu mashuri rizafasha mu kurengera ibidukikije no guteza imbere ubuzima bwiza bw'abanyeshuri n'abakozi b'ibigo by'amashuri.
Ambasaderi w'u Buyapani mu Rwanda, yavuze ko Guverinoma y'u Buyapani ikomeje gushyigikira ibikorwa biteza imbere iterambere rirambye no guhangana n'ingaruka z'imihindagurikire y'ibihe.
Yagaragaje ko uyu mushinga uzatanga umusanzu ukomeye mu kurengera ibidukikije, kugabanya imyuka ihumanya ikirere no guteza imbere imibereho myiza y'abanyeshuri n'abaturage muri rusange.