Akarere ka Gakenke kakoreye urugendoshuri i Bugesera rugamije gukaza ingamba zo kurwanya igwingira
Mu rwego rwo gushaka ibisubizo birambye byo kurwanya imirire mibi n’igwingira mu bana, itsinda ry’abakozi b’Akarere ka Gakenke n’abafatanyabikorwa mu bijyanye n’ubuzima bw’umwana n’umubyeyi bagiriye urugendoshuri mu Karere ka Bugesera, hagamijwe kungurana ubumenyi n’ubunararibonye ku ngamba zafashije aka Karere kugabanya igipimo cy’igwingira no guteza imbere imikurire myiza y’abana.
Uru rugendoshuri rwabaye ku wa 28-30 Ukwakira 2026, aho iryo tsinda ryari riyobowe na Visi Meya w’Akarere ka Gakenke ushinzwe Imibereho Myiza y’Abaturage, ari kumwe n’abakozi b’Akarere ndetse n’abafatanyabikorwa mu bikorwa byita ku buzima bw’umwana n’umubyeyi.
Mu biganiro byabanje, ubuyobozi bw’Akarere ka Bugesera bwagaragarije itsinda ryaturutse i Gakenke ingamba zitandukanye zashyizweho mu gukumira imirire mibi n’igwingira, ibyagezweho, imbogamizi ndetse n’uruhare rw’abafatanyabikorwa mu gukemura iki kibazo.
Mu byagarutsweho, ni uko igipimo cy’igwingira mu bana muri Bugesera cyavuye kuri 26.1% mu 2020 kigera kuri 20.8% mu 2025. Ibi byashingiwe ku ngamba zirimo gutanga Shisha Kibondo ku bagore batwite n’abana, amata, Sosoma, Ongera Intungamubiri n’ibiribwa byihariye bigenewe abana bafite imirire mibi ikabije.
Hagarutswe kandi ku ruhare rw’abajyanama b’ubuzima mu gusuzuma abana, kubohereza ku bigo nderabuzima igihe bikenewe no gukurikirana abafite ibibazo by’imirire mibi kugira ngo bahabwe ubufasha hakiri kare.
Izindi ngamba zagaragajwe zirimo Icyumweru cyahariwe ubuzima bw’umwana n’umubyeyi, ubukangurambaga bwa Hehe n’Igwingira, guteza imbere imirima y’imboga n’ibiti by’imbuto ziribwa, igikoni cy’umudugudu, ingo mbonezamikurire y’abana bato (ECDs) no gutanga ifu y’igikoma ku bana bazitabira izi serivisi.
Itsinda ry’Akarere ka Gakenke ryasobanuriwe kandi uruhare rw’ubufatanye n’abafatanyabikorwa, guhuza ibikorwa byo kurwanya imirire mibi n’imihigo y’Akarere ndetse na gahunda ya Nkuza Neza, byose bigamije guteza imbere imikurire myiza y’umwana kuva akiri muto.
Kwita ku mwana bitangirira mu muryango
Mu rwego rwo kureba uko izi gahunda zishyirwa mu bikorwa, itsinda ryasuye Igicumbi cy’Imikurire y’Umwana cyitwa “Twite ku Mikurire y’Umwana”, giherereye mu Murenge wa Musenyi, aho ryasobanuriwe imikorere yacyo n’uburyo gifasha ababyeyi kurera abana neza no kubitaho mu buryo buboneye.
Muri iki gicumbi, abagize itsinda beretswe uburyo ababyeyi bahurizwa mu matsinda yo kwizigama, aho buri wese atangira atanga amafaranga 200 Frw, hagamijwe kubaka umuco wo kwizigama, guteza imbere imikoranire no kongera ubushobozi bw’imiryango mu kwita ku bana.
Aya matsinda anafasha ababyeyi guhura, gukurikirana no kungurana ubumenyi ku buryo bwo kwita ku bana, kubagaburira indyo yuzuye no kubarinda imirire mibi n’igwingira.
Gusura ibikorwa bifasha umwana gukura neza
Ku munsi wa kabiri w’urugendoshuri, itsinda ryakomereje ku bikorwa bitandukanye byo gukumira imirire mibi n’igwingira mu bana, riherekejwe na Visi Meya ushinzwe Imibereho Myiza y’Abaturage mu Karere ka Bugesera.
Ryasuriye Ikigo Nderabuzima cya Avega Ntarama, aho ryaganiriye n’ababyeyi bahabwa ifu ya Shisha Kibondo, risobanurirwa uburyo abana bapimwa kugira ngo hamenyekane uko bahagaze mu mirire, ndetse n’inyigisho zihabwa ababyeyi ku mirire iboneye n’imikurire myiza y’abana.
Itsinda kandi ryaganiriye n’abagore batwite baje kwipimisha ndetse n’ababyeyi bazanye abana bato gukingizwa. Ibi byatanze umwanya wo gusobanukirwa uburyo serivisi z’ubuzima zihuzwa n’inyigisho ku kwita ku mwana kuva agisamwa kugeza yujuje imyaka ibiri, ari cyo gihe cy’ingenzi mu gukumira imirire mibi n’igwingira.
Urugendoshuri rwakomereje kuri Gasore Serge Foundation, ikigo kigira uruhare mu kongerera ubushobozi abarezi bo mu ngo mbonezamikurire y’abana bato (Caregivers), hagamijwe kunoza uburyo bitaho abana no kubafasha gukura neza.
Abagize itsinda basuye ibyiciro bitandukanye by’abana barererwa muri iki kigo, basobanurirwa uburyo bahabwa uburere n’ubufasha mu bijyanye n’imirire, ubuzima n’iterambere ryabo. Banaganiriye n’ababyeyi bahabwa ubufasha n’inyigisho mu gihe cy’amezi atandatu, bugamije kubongerera ubumenyi n’ubushobozi bwo kwita ku mirire y’abana no gukumira igwingira.
Sura X Umunsi wa mbere bakirwa n'ubuyobozi bw'Akarere
ibikorwa byasuwe ku munsi wa mbere