Umuyobozi w'Akarere wungirije ushinzwe Imibereho Myiza y'abaturage, Madamu Uwamahoro Marie Thérèse yifatanyije n’Ibitaro by’Akarere bya Nemba mu birori byo kwizihiza umunsi Mpuzamahanga w'abarwayi, ubaye ku nshuro ya mirongo itatu na gatatu (33). 

Uyu munsi mpuzamahanga wizihijwe ku wa 09 Gashyantare 2025 ku Nsanganyamatsiko  igira iti " Ukwizera ntigutamaza, ahubwo kuradukomeza mu bigeragezo (Rom 5,5)".

Ni ibirori byitabiriwe kandi n’Abayobozi, Abakozi b’Ibitaro by’Akarere bya Nemba, abarwayi n’abarwaza, Musenyeri Bizimungu Gabin n’abandi batumirwa.

Uyu munsi Mpuzamahanga w'abarwayi, wabimburiwe n'igitambo cya Misa  cyatuwe muri ibi bitaro na Musenyeri Bizimungu Gabin ari kumwe na Padiri  Aumônier w'ibitaro bya Nemba.

Umuyobozi w'Akarere wungirije ushinzwe Imibereho Myiza y'abaturage, Madamu Uwamahoro Marie Thérèse yashimiye ubuyobozi bw'ibitaro uburyo bita ku barwayi abasaba kuzirikana ku nshingano bafite, bita ku barwayi uko bikwiye no kubaha serivisi nziza

Musenyeri Bizimungu Gabin wari umushyitsi Mukuru muri uyu muhango, yashimiye Kiriziya Gatolika yashizeho uyu munsi wo kwita ku barwayi anavuga ko ubuzima bugizwe n'ibihe bishimishije n'ibihe bidashimishije bityo ko hagomba kuzirikanwa kuri ibyo bihe.

Umuyobozi Mukuru w'Ibitaro bya Nemba Dr.HABIMANA Jean Baptiste yavuze ko uyu munsi mpuzamahanga ari igihe cyo kuzirikana abarwayi, kubakomeza bagakira vuba, kuzirikana no gufata ingamba ku ndwara z'ibyorezo mu rwego rwo kuzihashya

Ibitaro bya Nemba ni bimwe muri bitaro biri ku rwego rw'Ibitaro by'Akarere, hakiyongeraho ibya Gatonde n'ibya Ruli