Umuganda rusange usoza ukwezi kwa Mata 2024 mu Karere ka Gakenke wibanze ku gikorwa cyo gutunganya igishanga cya Gashenyi, Umuyobozi w’Akarere ka Gakenke, hamwe n’abandi bayobozi mu nzego zinyuranye zirimo n’izishinzwe umutekano, bakaba bifatanyije n’abaturage muri icyo gikorwa.

Mu Karere ka Gakenke, abaturage bitabiriye umuganda bifatanyije mu gutunganya imigende iyobora amazi mu gishanga cya Gashenyi, kiri ku buso bwa Ha 65. Iki gishanga giherereye mu Mudugudu wa Busaro, Akagari ka Taba mu Murenge wa Gashenyi, ubuso bunini bw’ubutaka bwaho muri kino gihembwe cy’ihinga, bwahujwe ku gihingwa cy’ibishyimbo bigufi, kikaba kimwe mu byihanganira ikirere n’ubutaka byo muri kano gace.

Gusibura imigende y’amazi y’igishanga cya Gashenyi bizafasha mu gukumira Ibiza

Manirakiza Elisa agira ati “Mu mwaka ushize mu gihe cy’imvura yo mu kwa cyenda iki gishanga cyibasiwe n’ibiza, Dushimira ingamba zafashwe mu gukumira ibyo biza none ziyongereyeho no gutunganya iyi migende y’amazi akinyuramo. Izi mbaraga zihashowe natwe tugiye gushyiraho akacu tuhabungabunge kugira ngo bizadufashe kweza umusaruro ufatika”.

Brig. Gen Nelson Rwigema ukuriye Ingabo mu Ntara y’Amajyaruguru, wari hamwe n’Umuyobozi w’Akarere ka Gakenke, Madamu Mukandayisenga Vestine, mu butumwa aba bombi bagarutseho bwibanze ku kwibutsa abaturage uruhare rwabo mu gushyigikira iterambere, by’umwihariko barushaho kubungabunga umutekano no kwirinda amakimbirane.

Abaturage bibukijwe uruhare rwabo mu gushyigikira iterambere, by’umwihariko barushaho kubungabunga umutekano no kwirinda amakimbirane.

Mu Mirenge itandukanye naho hakozwe umuganda usoza ukwezi kwa Mata 2024.