Ku nshuro ya 30, u Rwanda rwizihiza Umunsi w’Intwari z’Igihugu, mu Ntara y’Amajyaruguru kuri uyu wa Kane tariki ya 01/02/2024, Guverineri Mugabowagahunde Maurice ari kumwe na Hon. Bituguramye Diogène, Hon. Muhakwa Valens, Hon. Murebwayire Christine, Ubuyobozi bw'Akarere ka Gakenke, Inzego z'Umutekano mu Ntara y'Amajyaruguru n'Akarere bifatanyije n'abaturage b'Umurenge wa Ruli kwizihiza Umunsi w'Intwari z'u Rwanda ku nshuro ya 30, Insanganyamatsiko igira iti" Ubutwari mu Banyarwanda, Agaciro kacu ".

Ibirori byo kwizihiza  Umunsi w'Intwari z'u Rwanda mu Murenge wa Ruli byabimburiwe no gutaha ibikorwa by’indashyikirwa byakozwe muri gahunda y’urugamba rw’iterambere birimo umuyoboro w'amazi wa Nyarubira ufite uburebure bwa Km 53, ufite amavomo 34, hatashywe amazu 12 y'ubakiwe abatishoboye.

Ibirori byaranzwe kandi no kumurika ibikorwa bitandukanye bifite uruhare mu guteza imbere imibereho y’abaturage birimo ubucukuzi bw'amabuye y'agaciro, inganda za Kawa, Amakoperative akora ubuhinzi n’ubworozi, ubukorikori, amashuri n'ibitaro ndetse no kuremera  amatungo atandukanye imiryango itishoboye.

Mu Kiganiro cyatanzwe na Hon. Bitunguramye Diogène, cyagarutse ku butwari mu mateka y'u Rwanda, agaragaza uko ubutwari bwakuye u Rwanda mu bihe bikomeye. Asaba abari aho gukomera ku muco w'ubutwari no gukomeza kuzirikana intwari zabohoye Igihugu zirangajwe imbere na H.E Paul Kagame.

Guverineri w'Intara y'Amajyaruguru, mu ijambo rye, yashimiye abaturage b'Umurenge wa Ruli ibikorwa by'ubudashyikirwa bagezeho, abasaba kubisigasira no kubirinda, gukomeza kwikemurira ibibazo bikibangamiye iterambere rya bo, Kwimakaza umuco w'isuku, Kurwanya igwingira no Kwirinda ubusinzi.

Guverineri yibukije kandi abaturage ko uyu munsi tuzirikana ibikorwa by’ikirenga byaranze Intwari kugeza aho zimwe muri zo zatanze ubuzima bwazo, bityo anasaba buri wese kubifatiraho urugero.

Yasoje ijambo rye yibutsa gahunda z'ingenzi ziteganyijwe muri uyu mwaka 2024, anabasaba kuzigiramo uruhare ari zo:

Amatora ya Nyakubahwa Perezida wa Repubulika n'Abadepite, kwibuka ku nshuro ya 30 Jenoside yakorewe Abatutsi, kwibohora ku nshuro ya 30 no kwita Izina abana b'Ingagi ku nshuro ya 20.

Kwizihiza Umunsi w'Intwari bikaba byabereye mu Midugudu yose igize Akarere ka Gakenke, Abayobozi batandukanye bakaba babonye umwanya wo gusabana .