Kuri uyu wa Gatatu tariki ya 21/06/2023, Hon.Muhakwa Valens ari hamwe n'Umuyobozi w'Akarere wungirije ushinzwe Imibereho Myiza y'abaturage Madamu Uwamahoro Marie Thérèse bifatanyije  n'abaturage ba Ruli mu gikorwa cyo Kwibuka ku nshuro ya 29, abana n'abagore bazize Jenoside yakorewe Abatutsi mu 1994.Uyu muhango wabereye ku Rwibutso rwa Ruli mu Murenge wa Ruli.

Uyu muhango witabiriwe na Perezida wa IBUKA mu Karere ka Gakenke, Abakozi  b'Umurenge wa Ruli, abana bari bahagarariye abandi, Urubyiruko ndetse n'abaturage.

Umuyobozi w'Akarere wungirije ushinzwe Imibereho Myiza y'abaturage Madamu Uwamahoro Marie Thérèse yasabye abana n'urubyiruko kwigira ku mateka yaranze igihugu cyacu, kwirinda amacakubiri n' ingengabitekerezo ya Jenoside ndetse no kuyamaganira kure.

Hon. Muhakwa Valens mu ijambo rye, yabwiye abitabiriye igikorwa cyo kwibuka abana n'abagore bazize Jenoside ko kwibuka ari umwanya wo guha agaciro abanyarwanda bishwe muri Jenoside yakorewe Abatutsi mu 1994 ndetse n'umwanya wo kuzirikana abayirokotse, tubaba hafi no kubakomeza.

Yasoje asaba abana kwirinda ingengabitekerezo ya Jenoside aho yaturuka hose ndetse anabasaba kuzajya bitabira gahunda zo kwibuka kugira ngo barusheho kumenya amateka mabi u Rwanda rwanyuzemo.

Urwibutso rwa Ruli rushyinguwemo imibiri 202 y'abazize Jenoside yakorewe Abatutsi mu 1994.