Uyu munsi Mpuzamahanga w’Umugore wizihijwe kuri uyu wa Kabiri tariki 08 Werurwe 2022, ku rwego rw’Igihugu  wizihirijwe mu Karere ka Gakenke,  Umurenge wa Nemba, ku nsanganyamatsiko igira iti: “Uburinganire n’Ubwuzuzanye mu mihindagurikire y’ibihe”.

Abashyitsi batandukanye bitabiriye uyu munsi mukuru uba rimwe mu mwaka barimo: Minisitiri w'Uburinganire n'Iterambere ry'Umuryango Prof. Bayisenge Jeanette, Minisiteri w'Ibidukikije Dr. Mujawamariya Jeanne d'Arc, Minisitiri w'Ikoranabuhanga na innovation Madamu Paula Ingabire, Umunyamabanga wa Leta muri Minisiteri y'Uburezi Bwana Twagirayezu Gaspard, Fodé Ndiaye/Resident Coodinator One UN, Abagize Ihuriro ry'Abagore bari mu Nteko Ishinga Amategeko FFRP, Guverineri w'Intara y'Amajyaruguru Madamu Nyirarugero Dancille, Inzego z'Umutekano mu Ntara y'Amajyaruguru, Ubuyobozi bw'Akarere ka Gakenke n’Inzego z'Umutekano mu Karere ka Gakenke.

Babanje gusura ibikorwa abagore bagiramo uruhare birimo: Ituragiro rya Kijyambere, kurwanya imirire mibi, gukora imbabura mu rwego rwo guhangana n’imihindagurikire y’ibihe, Imitobe (Juice) na Divayi (Wine) bikomoka ku mbuto ya marakuja n’inanasi, Ibihingwa by’imibavu n’Ibikoresho by’ikoranabuhanga bitandukanye byose bikorerwa mu Karere ka Gakenke.

Mu ijambo rye, Minisitiri w’Ibidukikije, Dr Mujawamariya Jeane d’Arc, yavuze ko kwizihiza umunsi Mpuzamahanga w’Umugore ari umwanya wo kuzirikana uruhare rw’Umugore mu iterambere ry’Igihugu n’isi muri rusange, anavuga ko abagore n’abakobwa barimo abayobozi bakomeye bazana impinduka zigaragara mu byerekeye kurwanya no guhangana n’imihindagurikire y’ibihe.

Abagore bagira uruhare mu igenamigambi, ikurikiranabikorwa n’isuzumabikorwa ryerekeye guhangana n’imihindagurikire y’ibihe kugirango twubake ejo hazaza habereye ikiremwamuntu.

Minisitiri w’Ibidukikije yasabye kandi abagore kubyaza umusaruro uburenganzira ndetse n'amahirwe bijyana no gukomeza kugira uruhare rugaragara mu kubungabunga ibidukikije bafata n'ingamba zifatika zijyanye n'imihindagurikire y'ibihe kandi buzuzanya nabo bashakanye. Abagabo basabwe gutera abagore ingabo mu bitugu bafatanya muri gahunda z'imihindagurikire y'ibihe mu kwirinda kwangiriza ibidukikije.

Minisitiri w’Uburinganire n’Iterambere ry’Umuryango Prof. Bayisenge Jeanette yagarutse ku nsanganyamatsiko y’uyu mwaka ati “ Bikomeje kugaragara ko ikibazo cy’imihindagurikire y’ibihe ari ikibazo gikomereye abatuye isi n’u Rwanda by’umwihariko kandi kitureba  twese: abagabo, abagore, abana b’abahungu ndetse n’ab’abakobwa.”

Mukamurigo Béatrice n’umugabo we Simparikubwabo Viateur, bemezako bari babayeho nabi cyane ariko kuri ubu ngo amahoro akaba ahinda babikesha kwicara bakaganira ku rugo rwabo. Mukamurigo Béatrice ati: “Uzi inshyi n’imigeri nariye ndetse nkanarazwa hanze”.  Simparikubwabo Viateur nawe ati: “Kubera gushukwa na bagenzi banjye mu tubari natahaga nabaye nk’intare bigatuma duhora mu makimbirane”.

Kuri uyu munsi, uru rugo rwashimiwe kuko rwahindutse, maze mu nka zatanzwe, nabo bagabirwa inka yo kuzakamirwa abana babo. N’akanyamuneza kenshi, ati: “Paul Kagame aragahora ku ngoma kandi ahorane amata ku ruhimbi, we wazanye uburinganire n’ubwuzuzanye. Kuri ubu natwe tukaba tubanye neza cyane”.

Muri uyu muhango wabereye muri Gakenke hatanzwe Telefone ngendanwa zigezweho (Smartphones) 298 zahawe abahuzabikorwa b’Inama y’Igihugu y’Abagore ku rwego rw’Umurenge n’Abajyanama b’Ubuzima, inka 22, inkoko 843, ihene 100, Imbabura za rondereza 100 n’ibigega 41 bifata amazi, byose bikaba bizafasha mu gukomeza guhangana n’ingaruka z’ihindagurika ry’ibihe.

Guha imiryango ibigega by'amazi.

Gikwerere Patrick