Urubyiruko rurasabwa  kubakira ku butwari bwaranze ingabo z’u Rwanda  zabohoye igihugu ,  bimakaza umuco wo gukunda umurimo  n’Igihugu mu ri rusange  kuko aribyo bizatuma baba intwari nkabababanjirije.

Ibi ni ibyagarustweho na Hon. Depité Diogène Bitunguramye  ubwo hizihizwaga umunsi mukuru w’Intwari z’Igihugu  ku nshuro ya 29 mu Karere ka Gakenke kuri uyu wa gatatu tariki ya 01 Gashyantare 2023.

Kwitwa Intwari ni ukurangwa n’ibikorwa  by’indashyirwa bikorwa  ku nyungu rusange hagamijwe iterambere kuri bose, aha niho bamwe mu rubyiruko  rwo mu Karere ka Gakenke by’umwihariko  mu Murenge wa Rusasa bahera bavuga ko bahereye ku bikorwa byaranze Intwari z’Igihugu , nabo bagomba kubigiraho batera ikirenge mu cyabo, bakora imirimo ifitiye Igihugu akamaro, bimakaza imbere ubumwe , umurino no gukunda Igihugu.

Hon.Depité Diogène Bitunguramye  wari umushyitsi mukuru kuri uyu munsi  w’Intwari mu Karere ka Gakenke yasabye urubyiruko kubakira ku butwari bwaranze Ingabo z’u Rwanda  zabohoye Igihugu ,  bimakaza umuco wo gukunda umurimo  n’Igihugu muri rusange  kuko aribyo bizatuma baba intwari nkabababanjirije.

Umuyobozi w’Akarere ka Gakenke, Bwana Nizeyimana Jean Marie Vianney yasabye abaturage gukomeza gufatira ku byiza u Rwanda rukesha Intwari tugakomeza gushishikarira kwiteza imbere kuko u Rwanda rukwiye ibyiza Abanyarwanda tugizemo uruhare.

Umuyobozi w’Akarere ka Gakenke yasabye kandi urubyiruko gushishikarira kwiga no kubaka ubumenyi kuko Igihugu cyacu gifite icyerekezo cyo kubaka ubukungu bushingiye ku bumenyi.

Umunsi Mukuru w’Intwari z’Igihugu ni umunsi ngaruka mwaka wizihizwa buri taliki ya 1 Gashyantare buri mwaka , aho Abanyarwanda n’inshuti zabo bazirikana ubutwari bwaranze ababohoye u Rwanda  barukura mu icuraburindi, aho bibukiranya ibigwi byabaranze  nuko imirimo  y’ubutwari bakoze twayigiraho dutera ikirenge mu cyabo.

Umuhoza Mariane, umwe mu rubyiruko mu Murenge wa Rusasa avuga ko nk’urubyiruko bahereye ku bikorwa byaranze Intwari z’Igihugu , nabo bagomba kubigiraho batera ikirenge mu cyabo, bakora imirimo ifitiye Igihugu akamaro, bimakaza imbere ubumwe , umurino no gukunda igihugu.

Nishimwe Jean Baptiste, uhagarariye urubyiruko mu Murenge wa Rusasa avuga ko bagomba kubahiriza gahunda za Leta, bitangira igihugu mu mirimo rusange, ndetse no kubungabunga ibyagezweho kugira ngo bakomeze batere imbere.

Kuri uyu munsi taliki ya 1 Gashyantare hirya no hino mu Rwanda kizihijwe umunsi w’Intwari ku nshuro ya 29 ufite insanganyamatsiko igira iti “Ubutwari mu banyarwanda Agaciro kacu.”

Gikwerere Patrick