Ku wa 21 Mata 2026, Minisitiri w’Ubutegetsi bw’Igihugu, Dominique Habimana, yagiriye uruzinduko mu Karere ka Gakenke, aho yasuye ibikorwa by’iterambere mu Mirenge ya Muhondon a Ruli, birimo imirimo yo kuvugurura Ikigo Nderabuzima cya Muhondo, Koperative Dukundekawa Musasa ihinga ikanatunganya kawa na Koperative COMIKAGI icukura ikanatunganya amabuye y’agaciro.

Ibi bikorwa yabisuye ari kumwe na Guverineri w’Intara y’Amajyaruguru, Mugabowagahunde Maurice, Umuyobozi w'Akarere, Mukandayisenga Vestine, inzego z'umutekano, Abakozi b'Akarere, abafatanyabikorwa n'Imirenge yasuwe.

Koperative Dukundekawa yasuye, igira uruhare rukomeye mu guteza imbere ubukungu n’imibereho y’abaturage, binyuze mu gutunganya kawa yoherezwa ku isoko mpuzamahanga, gutanga akazi ku baturage benshi, no guteza imbere ibindi bikorwa by’ubukungu n’imibereho myiza.

Dukundekawa Musasa itunganya kawa nziza yoherezwa ku isoko mpuzamahanga, igizwe n'abanyamuryango barenga 1100, ikoresha abakozi bahoraho 55, ikawa yaba yeze hagakora abagera kuri 550. Iyi koperative inafite ikusanyirizo ry'amata ritunganya litiro 5000 ku munsi, irerero ryigisha abana b’ababyeyi bahakora n'ibindi bikorwa biteza imbere abaturage nko kuboroza inka muri Girinka, ikigo cy’ubukorikori n'ibindi.

COMIKAGI yasuwe, ni koperative icukura ikanatunganya amabuye y'agaciro (Cassiterite, Coltan, etc) ikageza ku isoko umusaruro utunganyije neza. Ikoresha abaturage bagera ku 1500 buri munsi kuri site 6 zicukurwamo.

Minisitiri w’Ubutegetsi bw’Igihugu yashimiye uruhare rw'izi Koperative zasuwe mu guteza imbere iterambere n'imibereho myiza y'abaturage, anasaba ko zongera umusaruro mu bwiza no mu bwinshi kugira ngo barusheho guhatanira amasoko mpuzamahanga.

Minisitiri w’Ubutegetsi bw’Igihugu yanakoranye Inteko y’Abaturage n’abaturage bo mu Kagari ka Ruli mu Murenge wa Ruli, aganira nabo kuri gahunda zitandukanye zigamije guteza imbere imibereho y'abaturage n'umutekano wabo.