Minisitiri w’Ubutegetsi bw’Igihugu, Musabyimana Jean Claude yashimiye by’umwihariko ubuyobozi n’abaturage b’Akarere ka Gakenke uburyo basobanukiwe akamaro ka serivisi z’irangamimerere, bikaba bigaragazwa n’uko ari ko kahize utundi ku rwego rw’Igihugu mu gutanga izo serivisi.

Raporo ya Minisiteri y’Ubutegetsi bw’Igihugu igaragaza uko Uturere dukurikirana mu gutanga serivisi z’Irangamimerere mu mwaka w’ingengo y’imari 2023/2024, igaragaza ko Akarere ka Gakenke kari ku mwanya wa mbere n’amanota 99.0%, kagakurikirwa na Nyarugenge ifite 98.9%, Muhanga ifite 94.8% na Huye 94.6%.

Ku wa 27 Kanama 2024, ubwo mu Murenge wa Kivuruga mu Karere ka Gakenke hizihizwaga umunsi Nyafurika w’Irangamimerere, hanatangizwa icyumweru cy’Irangamimerere ku rwego rw’Igihugu, Minisitiri Musabyimana Jean Claude yashimye uburyo aka Karere kitwaye mu gutanga serivisi z’irangamimerere.

Ibirori byo kwizihiza uyu munsi Nyafurika w’Irangamimerere wari ufite insanganyamatsiko igira iti “Ikoranabuhanga mu Irangamimerere Ridaheza”, byitabiriwe n’abayobozi batandukanye barimo Minisitiri Musabyimana Jean Claude, Guverineri w’Intara y’Amajyaruguru, Mugabowagahunde Mourice, Umuyobozi w’Akarere Ka Gakenke, Mukandayisenga Vestine n’abandi.

Minisitiri Musabyimana  Jean Claude yavuze ko kwitabira gusaba no guhabwa serivisi z’irangamimerere bifite akamaro mu igenamigambi ry’igihugu no ku baturage muri rusange, asaba abacikanywe kwihutira kuzisaba by’umwihariko muri iki cyumweru.

Minisitiri Musabyimana Jean Claude yavuze ko guhitamo kwizihiriza uyu munsi no gutangiriza icyumweru cyahariwe Irangamimerere mu Karere ka Gakenke ari mu rwego rwo gushimira abayobozi n’abaturage ku musaruro bagaragaje mu gutanga izo serivisi.

Ati “Tukaba tubashimira ko Akarere k’Intara y’Amajyaruguru mwaje mu Turere tune twa mbere twahize utundi mu Gihugu, mu kwitabira gutanga serivisi z’irangamimerere ku baturage.”

Minisitiri Musabyimana Jean Claude yavuze ko mu rwego rwo kwegereza abaturage serivisi z’irangamimerere, ibitabo byose by’irangamimerere byashyizwe mu ikoranabuhanga ku buryo umuntu abasha kuzihabwa atarinze gukora urugendo runini, ahubwo akaba ashobora kuba yabyikorera ubwe aho yaba ari hose.

Umuyobozi w’Akarere ka Gakenke, Madame Mukandayisenga Vestine, yavuze ko kugira ngo aka Karere kabe aka mbere byatewe n’ubukangurambaga bwakozwe.

Ati “Ibi bipimo byiza mubona mu Karere ka Gakenke bituruka ku bukangurambaga buhoraho, ubumenyi abakozi bahawe ndetse n’abaturage beza bazi akamaro k’irangamimerere.”

Kwandika abana bavutse mbigo by’Ubuzima mu Karere ka Gakenke biri ku gipimo cya 99.5% bangana na 7742, kwandika abantu bapfiriye mu bigo by’ubuzima, handitswe 460 bangana na 99.8%, abana bavukiye ahatari kwa muganga handitswe 754 bangana na 100%, abapfiriye ahatari kwa muganga handitswe 669 bangana na 100%, imiryango 1772 yabanaga itarasezeranye byemewe n’amategeko yarasezeranyijwe.

Iki cyumweru cy’Irangamimerere cyatangijwe ku wa 27 Kanama 2024 kizagera ku ya 3 Nzeri 2024, abaturage bazoroherezwa kwandikisha imimerere irimo n’iyo bakerewe nko kwandikisha abavutse, Kwandukuza abapfuye, Gushyingirwa mu mategeko kw’ababana, Kwemera umwana, Kwishingira umwana cyangwa umukuru n’ibindi.

  Umwanditsi: Evariste Nsengimana