Bamwe mu barokotse Jenoside mu Karere ka Gakenke bagarutse ku mateka ashaririye banyuzemo yasize benshi bambuwe ubuzima harimo n’abajugunywe mu mugezi wa Nyabarongo.

Abafite ababo bishwe  bakabajugunya mu mugezi wa Nyabarongo muri Jenoside yakorewe Abatutsi mu 1994, basomye amazina yabo mu rwego rwo kubibuka ati “ Bazahora babibuka”.

Ku mugezi wa Nyabarongo mu Murenge wa Mataba, kuri uyu wa Gatatu tariki ya 12 Mata 2023 habereye igikorwa cyo kwibuka ku nshuro ya 29 Jenoside yakorewe Abatutsi mu 1994. Abayobozi batandukanye bashyize indabo muri Nyabarongo bibuka Abatutsi bishwe bakabajugunya muri uwo mugezi.

Umuyobozi w’Akarere ka Gakenke, Nizeyimana Jean Marie Vianney, yashimangiye  ko nk’ubuyobozi bakomeje gufata mu mugongo no kwihanganisha imiryango yo mu Karere ka Gakenke yabuze ababo bazize Jenoside yakorewe Abatutsi mu 1994 ndetse yihaganisha by’umwihariko imiryango y’abafite ababo bazize Jenoside bajugunywe mu mugezi wa Nyabarongo.

Umuyobozi w'Akarere ka Gakenke yasabye abaturage bo mu Murenge wa Mataba gukomeza kuba hafi no gufata mu mugongo abarokotse Jenoside yakorewe Abatutsi mu 1994 no kwirinda ingengabitekerezo yayo. Yasabye kandi urubyiruko gukurikirana ibiganiro bitangwa muri iki gihe cyo kwibuka haba kuri Radio na Television kugirango barusheho gusobanukirwa amateka ya Jenoside, kwirinda ingengabitekerezo yayo no kujya basura inzibutso.

Perezida wa  IBUKA mu Karere ka Gakenke, Bwana Twagirimana Hamdun arashimira Leta y'u Rwanda uburyo ibahora hafi kandi igakemura ibibazo, Abarokotse Jenoside yakorewe Abatutsi bahura nabyo.Yasabye abaturage ba  Gakenke kurwanya ingengabitekerezo ya Jenoside. Asaba kandi urubyiruko byumwihariko gusigasira ibyagezweho ndetse no kwihatira kumenya amateka mabi yaranze Igihugu cyacu.

Igikorwa cyo kwibuka ku mugezi wa Nyabarongo mu Murenge wa Mataba cyitabiriwe n'Umunyamabanga Nshingwabikorwa w'Intara y'Amajyaruguru Dr.Mushaija Geoffrey, Ubuyobozi bw'Akarere ka Gakenke, Inzego z'Umutekano mu Karere ka Gakenke , Komite ya Ibuka ku rwego rw'Akarere n'Umurenge ndetse n'abaturage bo mu Murenge wa Mataba.

Umunyamabanga Nshingwabikorwa w’Intara y’Amajyaruguru Dr. Mushaija Geoffrey afatanya n’abandi bayobozi gucana urumuri rw’icyizere

Umugezi wa Nyabarongo waroshywemo Abatutsi  mu 1944

Ubuyobozi bw’Akarere ka Gakenke bamaze gushyira indabo mu mugezi bunamiye inzirakarengane zajugunywe muri Nyabarongo.