Ku wa 13 Mata 2026, mu Murenge wa Mugunga habereye igikorwa cyo #kwibuka32, Jenoside yakorewe Abatutsi, by'umwihariko abishwe bajugunywa mu migezi ya Mukungwa &Nyabarongo, cyabanjirijwe no gushyira indabo mu mugezi wa Mukungwa, mu rwego rwo kunamira Abatutsi bajugunywe mu migezi.

Iki gikorwa cyitabiriwe na Guverineri w’Intara y’Amajyaruguru, Mugabowagahunde Maurice, abayobozi n'abakozi muri Gakenke & Nyabihu, abahagarariye IBUKA, Inzego z'umutekano mu Karere & mu Ntara, abafite ababo bishwe bajugunywa mu migezi, Abarokotse Jenoside n'abaturage muri rusange.

Mu ijambo ry’ikaze, Umuyobozi w’Akarere, Mukandayisenga Vestine yihanganishije abarokotse Jenoside yakorewe Abatutsi, agaragaza ko #Kwibuka Jenoside yakorwe Abatutsi ari uburyo bunafasha abato kumenya uko amacakubiri yabibwe mu Banyarwanda akageza kuri Jenoside, bukanafasha gukumira ingengabitekerezo yayo.

Yakomeje agira ati “Dufatane urunana, ubumwe bwacu tubukomeze, ingengabitekerezo ya Jenoside tuyirwanye, tuyirandurane n'imizi yayo yose, tuyitwike ishye ikongoke ubuziraherezo. Rubyiruko, tugomba kumenya amateka yacu, kugira ngo twubake ejo hazaza heza.”

Perezida wa IBUKA mu Karere, TWAGIRIMANA Hamdoun, yavuze ko #Kwibuka ari umwanya wo guha icyubahiro Abatutsi bambuye bazira yuko bavutse, bikaba nk’umwe mu miti y’ihungababa ku barokotse Jenoside yakorewe Abatutsi kuko biha umwanya wo kuruhuka, ufite agahinda aterwa no kubura abe.

Guverineri w’Intara y’Amajyaruguru, Mugabowagahunde Maurice yavuze ko Jenoside yakorewe Abatutsi yakozwe mu buryo bwihuse bitewe n’amacakubiri yigishijwe n'abari abayobozi, agaya by'umwihariko abari abayobozi bateguye bakanashyira mu bikorwa Jenoside yakorwe Abatutsi muri aka gace.

amafoto kuri X