Ku wa 09 Gicurasi 2025, Mu bigo by’Amashuri yose yo mu Karere ka Gakenke habereye igikorwa cyo kwibuka ku nshuro ya 31, Jenoside yakorewe Abatutsi ku rwego rw’Amashuri abanza n’ayisumbuye.

Iki gikorwa kikaba cyitabiriwe n’Abagize Komite Nyobozi y’Akarere, abakozi bo mu nzego zitandukanye n’abahagarariye inzego z’Umutekano n’abandi.

Hakozwe ibikorwa bitandukanye birimo urugendo rwo kwibuka, kunamira no gushyira indabo aharuhukiye imibiri y'Abazize Jenoside yakorewe Abatutsi, hanatangwa ibiganiro bitandukanye.

Muri iki gikorwa, Umuyobozi w’Akarere akaba yifatanyije n’Abayobozi, abarezi n’abanyeshuri bo muri Lyce Saint Jerome Janja iherereye mu Murenge wa Janja, Umuyobozi w’Akarere wungirije ushinzwe Iterambere ry’Ubukungu yifatanya n’abo mu Rwunge rw’Amashuri rwa Nyarutovu ruherereye mu Murenge wa Nemba.

Hatanzwe kandi ubutumwa binyuze mu biganiro no mu ndirimbo bishishikariza abanyarwanda, by'umwihariko urubyiruko kwirinda ingengabitekerezo ya Jenoside, amacakubiri, ibikorwa n'imvugo bihembera urwango, kwimakaza ubumwe bw'abanyarwanda n'impamvu twibuka Jenoside yakorewe Abatutsi.

Umuyobozi w'Akarere, Madame Mukandayisenga Vestine, yabwiye abanyeshuri ko bari mu bakoresha imbuga nkoranyambaga, cyane cyane mu biruhuko kandi ko zifashishwa n'abahakana bakanapfobya Jennoside yakorewe Abatutsi, abasaba kuzajya babasubiza, bakababwira ukuri ku mateka y'uko Jenoside yakorewe Abatutsi yateguwe ikanashyirwa mu bikorwa.