Amakoperative atanu yo mu Karere ka Gakenke, afite ibikorwa by’ubuhinzi n'ubworozi yahawe moto zitwara imizigo zizwi nka Lifani, mu rwego rwo gufasha abaturage kubona uburyo bworoshye bwo kugeza umusaruro ku masoko. 

Izi moto zatanzwe ku wa 18 Gashyantare 2026 n’Ikigo cy'Igihugu gishinzwe iterambere ry'Ubwikorezi (RTDA) binyuze mu mushinga wo kubaka imihanda y’imigenderano uterwa inkunga na Banki y’Isi.

Koperative zahawe izi Lifani harimo DUHAGURUKE Mataba ihinga inanasi ikanakora ibiseke, COVAFA yo mu Murenge wa Gakenke, ikora umutobe mu mbuto, COTUMU yo mu Murenge wa Gakenke ikora ubuhinzi bw’ibigori, ICYEREKEZO 2031 TABA yo mu Murenge wa Gashenyi, ihinga ibigori n’ibishyimbo na TURWANEKUBUZIMA CYABINGO yorora ingurube.

Umuyobozi w'Akarere, Madamu Mukandayisenga Vestine yashimiye Igihugu gishinzwe iterambere ry'Ubwikorezi (RTDA) ku nkunga yahaye amakoperative, ashimangira ko uretse kuyafasha kugeza umusaruro ku isoko no kuzigama ikiguzi  bishyuraga bawugezeyo, bizanabongerera umwete wo kwita no gusigasira ibikorwa remezo.

Bamwe muri aba banyamuryango bashimangiye ko ubusanzwe bagorwaga no kugeza umusaruro ku masoko cyangwa kugeza inyongeramusaruro aho bakorara none izi Lifani zije ari igisubizo mu kazi kabo ka buri munsi, ndetse byongereye icyizere cyo kwihuta mu iterambere ryabo.

Intego y’iki gikorwa ni uguteza imbere abagore binyuze mu kubongerera ubushobozi no kuborohereza kugera ku masoko mu buryo buboneye kandi budahenze.