Ku Rwibutso rw'Akarere ka Gakenke ruri i Buranga mu Murenge wa Kivuruga, tariki ya 07 Mata 2024 hatangirijwe ku rwego rw’Akerere Icyumweru cy’Icyunamo n’iminsi 100 yo kwibuka ku nshuro ya 30 Jenoside yakorewe Abatutsi mu 1994, ku nsanganyamatsiko igira iti"Kwibuka Twiyubaka".

Iki gikorwa cyitabiriwe na Hon.Depite Murebwayire Christine, Inama Njyanama  y'Akarere, Inzego z'Umutekano mu Karere, uhagarariye Guverineri w'Intara y'Amajyaruguru, Abarokotse Jenoside yakorewe Abatutsi bafite ababo bashyinguwe mu Rwibutso rwa Buranga.

Umuyobozi w'Akarere ka Gakenke, Madamu Mukandayisenga Vestine yasabye abaturage kwirinda ingengabitekerezo ya Jenoside, gutanga amakuru yahantu hari imibiri itarashyingurwa kugira ngo ishyingurwe mu cyubahiro, gukomeza gufata mu mugongo abarokotse Jenoside yakorewe Abatutsi mu 1994 no kwamagana abahakana bakanapfobya Jenoside yakorewe Abatutsi mu 1994.

Umuyobozi w’Akarere wungirije ushinzwe Iterambere ry’Ubukungu, Bwana Niyonsenga Aimé François mu kiganiro yatanze kijyanye no kwibuka Jenoside yakorewe Abatutsi mu 1994, yasabye abitabiriye igikorwa cyo kwibuka mu Karere ka Gakenke n'Abanyarwanda muri rusange, gukumira no kurwanya imvugo zibiba urwango, kurwanya no guca umuco wo kudahana, kwibuka nk'igihango cy'Abanyarwanda, kwibuka ni inshingano za buri Munyarwanda wese.

Umuyobozi w’Akarere wungirije ushinzwe Iterambere ry’Ubukungu, arasaba urubyiruko gufata iyambere mu kurinda ibyagezweho mu rugendo rwo kubaka Igihugu no guhangana n'abapfobya n'abahakana amateka ya Jenoside.

Uhagarariye Ibuka mu Karere ka Gakenke Bwana Kabano Jean de Dieu, yibukije Abanyagakenke ko Urwibutso rwa Buranga haruhukiyemo imibiri y'Abazize Jenoside 1889, asaba urubyiruko kwitabira ibiganiro byo kwibuka kuko bakeneye kumenya amateka y'Igihugu cyacu bakanayasigasira.

Hiirya no hino mu Midugudu mu Karere ka Gakenke, naho habaye igikorwa cyo Kwibuka ku nshuro ya 30 Jenoside yakorewe Abatutsi mu 1994, hakaba hatanzwe ibiganiro n'ubutumwa bijyanye no kwibuka.