Kuri Centre d’Accuel Umunezero mu Karere ka Musanze, Kubufatanye bw’Akarere ka Gakenke n’urugaga rw’Abahinzi n’Aborozi mu Rwanda IMBARAGA ku nkunga ya NPA habereye amahugurwa y’iminsi 3 ku gukumira no gukemura amakimbirane mu miryango.

Umuyobozi w’Akarere ka Gakenke, Bwana Nizeyimana Jean Marie Vianney afungura  amahugurwa yasabye abayitabiriye kuyabyaza umusaruro mu rwego rwo gushishikariza abaturage kubaka umuryango uzira amakimbirane.

Nshimiyimana Jean Bosco, Umuhuzabikorwa w’umushinga PPIMA mu Karere ka Ruhango byumwihariko akanakurikirana ibikorwa byagezweho mu Karere ka Gakenke umwaka ushize avuga ko aya mahugurwa yatumiwemo inzengo zitandukanye ku rwego rw’Akarere n’Umurenge harimo Abayobozi ku rwego rw’Akarere, Abakozi bakorera ki biro by’Akarere, Abanyamabanga Nshingwabikorwa b’Imirenge, abakozi  bashizwe irangamimere ku rwego rw’Umurenge, CNF, Abunzi, MAJ, Inshuti z’Umuryango n’imboni z’Imiyoborere myiza  ati “Abo bose inshingano zabo n’ugufasha abaturage mu gukemura ibibazo byabo hagamijwe icyatuma umuturage atagana inkiko”.

Yakomeje avuga ko aya mahugurwa agamije gufasha abaturage gukemura ibibazo by’amakimbirane mu miryango binyuze mu kunga abafitanye ibibazo cyane cyane hagamijwe kugabanya amakimbirane mu miryango ati “Ikigamijwe n’ukubigisha uburyo bwakoreshwa kugira ngo abagiranye amakimbirane babashe kubahuza, babunge hakoreshwa, ubuhuza cyangwa kunga”.

Nshimiyimana yasabye abitabiriye amahugurwa kurushaho gukora inshingano zabo zo gufasha abaturage babagana bakoresha ubumenyi butandukanye bungutse bwo kubafasha kunga abaturage birinda kugana inkiko.

Niyoyita Jean Pierre, Umunyamabanga Nshingwabikorwa w’Umurenge wa Mataba avuga ko aya mahugurwa agiye kubafasha guhuza inzengo zose zirimo abunzi, inshuti z’umuryango, imboni z’imiyoborere myiza mu rwego rwo gukemura ibibazo by’abaturage cyane bakumira amakimbirane yo mu miryango kugira ngo bubake umuryango utekanye ariwo shingiro ry’Igihugu cyacu.

Yakomeje avuga ko amakimbirane kenshi aterwa n’ibintu bitandukanye ari byo amakimbirane: ashingiye ku mitungo, gusuzugurana n’ibindi.

Maniraho Osée, Perezida w’Abunzi mu Murenge wa Gashenyi avuga ko aya mahugrwa abafashije kumva neza amakimbirane aterwa n’ubwumvikane buke cyangwa imyumvire y’abashakanye ati “Icyo bagiye gukora n’ugusura urugo ku rundi rufite amakimbirane kuyareka bakabana neza  kugira ngo babashe kugera ku iterambere ry’umuryango”.

Mbarushimana Vianney akaba Pasiteri ukorera mu Murenge wa Mataba, avuga ko nyuma y’amahugurwa yo gukumira no gukemura amakimbirane mu miryango we n’abagenzi be binyuze mu madini n’amatorero bagiye gushishikariza abaturage kwirinda amakimbirane mu miryango.

 Yakomeje avuga ko bazahamagara mu nsengero cyangwa muri kiriziya imiryango ibana mu makimbirane bayiganirize bayereka ingaruka z’amakimbirane n’uko imiryango irimo amakimbirane idatera imbere.

Kabera Anathorie , Umuhuzabikorwa w’Inshuti z’Umuryango mu Murenge wa Kamubuga avuga ko nyuma y’amahugurwa bagiye kwegera imiryango ibana mu makimbirane bayihuze, bayigire inama kugira ngo bagere  ku iterambere ryabo.

Kabera yakomeje avuga ko amakimbirane ahanini ashingira ku mitungo, ubushoreke n’ubuharike,  bityo bakaba bagiye kunga, kuganiriza  imiryango ibana  mu makimbirane kugira ngo igire imyumvire nk’iyindi miryango ibanye neza.

Abitabiriye amahugurwa biyemeje kugira uruhare mu gukumira  no gukemura amakimbirane mu miryango

Gikwerere Patrick