Kuri uyu wa 11 Mata 2025, Minisitiri muri Perezidansi, Uwizeye Judith, yifatanyije n’abaturage bo mu Karere ka Gakenke mu gikorwa cyo Kwibuka ku nshuro ya 31 Jenoside yakorewe Abatutsi mu 1994, mu yahoze ari Superefegitura ya Busengo.

Iki gikorwa cyabanjirijwe no kunamira no gushyira indabo ku rwibutso rwa Jenoside yakorewe Abatutsi rw'Akarere rwa Gakenke ruherereye i Buranga, mu Murenge wa Kivuruga, ruruhukiyemo imibiri 1889, irimo n'ay'ibiciwe mu cyahoze ari Superefegitura ya Busengo.

Ni igikorwa cyitabiriwe n'abarimo Minisitiri muri Perezidansi, Hon Uwizeye Jidith, Umunyamabanga Nshingwabikorwa w’Intara y’Amajyaruguru, Ngendahimana Pascal, Abajyanama b’Akarere, imiryango ifite abayo biciwe mu cyahoze ari Superefegitura ya Busengo, Komite ya IBUKA, Inzego z'Umutekano, abaturage n'abandi baje kwifatanya n'Akarere mu #Kwibuka31, Jenoside yakorewe Abatutsi.

Iki gikorwa cyaranzwe n'ibiganiro, ubuhamya, ubutumwa mu ndirimo, imivugo bigaruka ku bubi bwa Jenoside n'ingengabitekerezo yayo.

Umuyobozi w'Akarere, yasabye abaturage gukomeza kurangwa n'ibikorwa by'urukundo n'imvugo zidasesereza. Yanashimye uruhare rw'Abacitse ku icumu mu rugendo rw'ubumwe n'ubwiyunge bw'Abanyarwanda.

Umuyobozi w’Akarere wungirije ushinzwe Iterambere ry'Ubukungu, yabahaye ikiganiro gifite insanganyamatsiko igira iti “Jenoside yakorewe Abatutsi mu 1994, isomo ku banyarwanda, ku Mahanga n’Ibihugu byo mu Karere” anagaruka ku mateka ya Jenoside yakorewe Abatutsi muri Busengo

Perezida wa IBUKA mu Karere ka Gakenke, Bwana Twagirimana Hamdoun, yihanganishije abantu bose bafite ababo biciwe mu cyahoze ari S/Perefegitura ya Busengo n'abahavanywe bakajyanwa kwicirwa mu cyahoze ari Cour d'appel ya Ruhengeri.

Minisitiri muri Perezidansi, Uwizeye Judith, yasabye abitabiriye iki gikorwa kumva ubukana bw'ingengabitekerezo ya Jenoside yabibwe mu banyarwanda, yatumye habaho Jenoside yakorewe Abatutsi mu 1994, anabibutsa kwirinda ibitekerezo biganisha ku kugirira abandi inabi.

Ati “Ndagira ngo abayobozi namwe baturage muri hano, mwumve uburemere ingengabitekerezo ya Jenoside yagize kugira ngo tugere kuri Jenoside yakorewe Abatutsi. Nituvuga ingengabitekerezo, twumve ubukana bwayo. Ibitekerezo bibi bituma wumva ko ushaka kugirira nabi mugenzi wawe tubyamagane.”

Kugeza ubu ntiharamenyekana umubare w'Abatutsi biciwe mu cyahoze ari Superefegitura ya Busengo ariko imibiri yabashije kuboneka mu byobo biri hafi y'ahari hubatse ibiro byayo ni 102. Ubuhamya butangwa n'abaharokokeye, bugaragaza ko hari n'abajyanywe kwicirwa mu bindi bice, birimo no mu cyahoze ari Cour d'Appel ya Ruhengeri.

Andi mafoto yarebe kuri X (Twitter) ukanze hano