Gakenke: Hibutswe abagore n’abana bazize Jenoside yakorewe Abatutsi
Ku rwibutso rwa Jenoside yakorewe Abatutsi rwa #Buranga hari kubera igikorwa cyo #Kwibuka32 abagore n'abana bishwe muri Jenoside yakorewe Abatutsi mu 1994, cyabanjirijwe no Kunamira no gushyira indabo kuri uru rwibutso ruruhikiyemo imibiri 1889 y'Abatutsi bazize Jenoside.
Iki gikorwa cyitabiriwe n'abayobozi barimo Umuyobozi w’Akarere, Mukandayisenga Vestine, Visi Meya ushinzwe imibereho myiza y'abaturage, abahagarariye [IBUKA, amadini n'amatorero, inzego z’umutekano, Inama Njyanama y'Akarere, ibyiciro by'abagore n'urubyiruko] n’abaturage muri rusange.
Mu ijambo ry’ikaze, Umunyamabanga Nshingwabikorwa w’Umurenge wa Kivuruga, Mukeshimana Alice, yagarutse ku gaciro k'umugore n’umwana mu muryango Nyarwanda kirengagijwe mu gihe cya Jenoside yakorewe Abatutsi mu 1994, anihanganisha imiryango yabuze abayo, bishwe bazira uko baremwe.
Mu kiganiro kuri Jenoside yakorewe Abatutsi, Mukundente Clarisse, yagarutse ku buryo Jenoside yakorewe Abatutsi mu 1994 yateguwe ikanashyirwa mu bikorwa bigizwemo uruhare n’ubuyobozi bubi, bwimakaje amacakubiri n’ingengabitekerezo ya Jenoside yabibwe mu banyarwanda n’Abakoloni.
Mu buhamya yatanze, Nimukuze Devotha yagarutse ku itotezwa ryakorewe Abatutsi mbere no mu gihe cya Jenoside yakorewe Abatutsi, asobanura uburyo Abatutsi, by'umwihariko abo mu muryango we bishwe urupfu rw'agashinyaguro n'abaturanyi bari basanzwe basangira bakanabakamira amata.
Visi Perezida wa mbere wa IBUKA mu Karere, Umuhoza Claudine, yavuze ko kwica umugore n'umwana muri Jenoside byabaye ikimenyetso cy'ubugome yakoranywe, bishimangira icyifuzo cy'abicanyi cyo kuzimya burundu Abatutsi, anenga by'umwihariko abagore bayigizemo uruhare.
Mu ijambo umuyobozi w’Akarere, Mukandayisenga Vestine yagejeje mu bitabiriye iki gikorwa, yavuze ko Jenoside yakorewe Abatutsi yakoranywe ubugome ndengakamere, ndetse ko abagore n’abana bari mu bishwe urupfu rw’agashinyaguro.
yanenze abagore bagize uruhare muri Jenoside, bica Abatutsi cyangwa bagatanga amakuru y’aho bihishe kugira ngo bicwe, anashima abagize umutima wa kimuntu wo guhisha abahigwaga. Yagaragaje ko nubwo igihugu cyacu cyanyuze mu mateka mabi, ubu cyongeye kwiyubaka.