Kuri uyu wa 03 Werurwe 2025 mu Cyumba cy’Inama cy’Akarere ka Gakenke habereye inama y'Umuryango uharanira kwihuza no kwigenga kw’Abanyafurika, Pan African Movement (PAM).

Iyi nama yayobowe n’Umuyobozi w'Akarere wungirije ushinzwe Iterambere ry'Ubukungu, hanabereyemo amatora y'abayobozi b’uyu muryango barimo abagize Komite nyobozi (Umuyobozi mukuru, Umuyobozi mukuru wungirije n’Umunyamabanga) n’abayobozi ba Komisiyo 12 zayo.

Ku mwanya w’Umuyobozi mukuru wa PAM ku rwego rw’Akarere ka Gakenke hatowe, Bwana Cyubahiro Felicien, Umuyobozi mukuru wungirije hatorwa Bwana Sinduhunga Abdon naho ku mwanya w’Umunyamabanga Madame Nisingizwe Delphine.

Umuyobozi w’Icyubahiro wa PAM ku rwego rw’Akarere ka Gakenke Madame Mukandayisenga Vestine, usanzwe ari Umuyobozi w’aka Karere yasabye abatowe kugaragaza impinduka mu nshingano batorewe, baharanira gushyira u Rwanda na Afurika ku mutima no guterwa ishema n'uko bitera imbere mu bukungu.

Umuryango PAM washinzwe mu 1946 nyuma y’Intambara ya Kabiri y’Isi, mu gihe ishami ry’u Rwanda, ryatangijwe muri Kanama 2015.