Guverineri w’Intara y’Amajyaruguru Madamu Nyirarugero Dancile ari kumwe n’Ubuyobozi bw’Akarere ka Gakenke, Inzengo z’Umutekano mu Karere ka Gakenke , kuri uyu wa mbere tariki ya 14 Ugushyingo 2022 yatangije kumugaragaro ibikorwa by’Urugerero rw’Inkomezabigwi 10/2022 rugizwe n’Intore zarangije amashuri yisumbuye mu mwaka wa 2021/2022.

Ku rwego rw’Intara  y’Amajyaruguru , urugerero rwatangirijwe mu Kagari ka Rusagara, Umurenge wa Gakenke ahubatse inzu ya 2 in 1 izatuzwamo imiryango itishoboye ya Nyirandikubwimana na Mukakirenga.

Mu gutangiza uru Rugerero rufite insanganyamatsiko igira iti, "Duhamye umuco w'Ubutore twimakaza Ubumwe n'Ubudaheranwa",Guverineri w’Intara y’Amajyaruguru Madamu Nyirarugero Dancille yifatanyije n'Intore zo mu Murenge wa Gakenke mu gikorwa cyo kubakira imiryango itishoboye ya Nyirandikubwimana na Mukakirenga.

Mu butumwa yagejeje ku Ntore zitabiriye Urugerero rw'Inkomezabigwi 10/2022 rudaciye ingando, Guverineri w’Intara y’Amajyaruguru yabasabye guha agaciro uru rugerero, rukababera umwanya mwiza wo kwiyubutsa indangagaciro zo gukunda Igihugu, gukunda umurimo no kuba intangarugero muri byose.

Guverineri yasabye kandi izi ntore zatangiye Urugerero kuzitabira uko bikwiye ibikorwa byose byateganyijwe kandi bakubahiriza igihe no kuzagaragaza uruhare rwabo mu bikorwa bigamije gukemura ibibazo bibangamiye imibereho myiza y'abaturage.

Gikwerere Patrick