Ku wa 8 Nyakanga 2025, mu Murenge wa Kamubuga w’Akarere ka Gakenke hatangirijwe ku mugaragaro ubukangurambaga bwo kurwanya ruswa, aho abaturage basobanuriwe ruswa, ingaruka zayo n’uko bayirinda.

Ibirori byo gutangiza ubu bukangurambaga byitabiriwe n’Umuvunyi Wungirije ushinzwe kurwanya akarengane, Madamu YANKURIJE Odette arikumwe n’Umuyobozi w’Akarere wungirije ushinzwe Iterambere ry’ubukungu, Bwana Aimé François, Umuyobozi w’Akarere ushinzwe Imibereho myiza y’Abaturage, Madamu Uwamahoro Marie Thérèse n’abahagarariye inzego z’Umutekano mu Karere.

Ubu bukangurambaga bwakorewe mu Kagari ka #Kamubuga, ahabereye Inteko y'Abaturage, bwari buri muri gahunda yo kwitegura Umunsi Nyafurika wo kurwanya Ruswa n'Akarengane, uba buri wa 11 Nyakanga 2025, aho uw’uyu mwaka wari ufite insanganyamatsiko igira iti “Kwimakaza ubumuntu mu rugamba rwo kurwanya ruswa”

Hatanzwe ibiganiro bivuga ku ngaruka zo gutanga, kwakira no guhishira ruswa, gushishikariza abaturage kwirinda ruswa, ubusobamuro bwa ruswa, kwirinda amakimbirane yo mu muryango, kwicungira umutekano, kwirinda ikoreshwa ry'ibiyobyabwenge n'ibindi.