Mu mashuri yose yo mu Karere ka Gakenke hatangijwe ku mugaragaro ubukangurambaga bwiswe “Fresheri Ku Ishuri” mu rwego rwo guteza imbere isuku n’isukura mu banyeshuri, abarimu n’abagize umuryango mugari w’ishuri, hagamijwe kubaka umuco uhamye w’isuku n’ubuzima bwiza.

Ubu bukangurambaga bwateguwe ku bufatanye na Minisiteri y’Uburezi, bwatangijwe ku wa 12 Mutarama 2026, bukaba buri gukorwa mu mashuri yose.

Ku rwego rw’Akarere ka Gakenke, iki gikorwa cyatangiriye ku Rishuri GS Ngazo I, kiyoborwa n’Umuyobozi w’Akarere ka Gakenke, Madamu Mukandayisenga Vestine, afatanyije n’Umuyobozi w’ishami ry’Uburezi mu Karere, Bwana Jean de Dieu Sinahamugaye.

Iki gikorwa cyitabiriwe n’abayobozi b’amashuri, inzego z’ibanze, abarimu, abanyeshuri n’abahagarariye ababyeyi, hagamijwe ubufatanye mu kwimakaza isuku n’isukura mu mashuri.

Ubukangurambaga “Fresheri Ku Ishuri” busaba abanyeshuri kugira isuku ku mubiri, ku myambaro, gufata neza ibyumba by’amashuri n’ubwiherero, kurengera ibidukikije ndetse no gusukura ahari umwanda mu nkengero z’ishuri. 

Hatanzwe ibiganiro n'inyigisho-ngiro bishishikariza abanyeshuri kwimakaza isuku. Bigishijwe by’umwihariko uburyo bakaraba intoki n’amazi meza n’isabune n’uko bakora isuku mu kanwa bifashishije uburoso na korogate, banahabwa umwanya wo kubisubiramo hagamijwe kureba ko babimenye.

Umuyobozi w’Akarere, Madamu Mukandayisenga Vestine, yabwiye abanyeshuri, abarezi n’abahagarariye ababyeyi ko #FresheriKuIshuri bisobanuye ishuri rifite isuku igaragara ku banyeshuri, abarezi, mu kigo cy’ishuri kandi ababyeyi n’abaturage bose babigizemo uruhare.

Ati “Abanyeshuri ubwanyu mubanze mwumve uko uko ugira isuku, niko uba witeguye no mu mutwe wawe kwakira ibintu bishyashya no mu byo wiga, ukaba simate. Iyi suku tuvuga ni niyo mu mutwe. Itangirira mu rugo, kuko umwaka agomba guturuka mu rugo yose neza kandi yambaye imyenda isukuye.”

Minisiteri y’Uburezi yatangaje ko ubu bukangurambaga buzashyirwa mu bikorwa mu mashuri yo hirya no hino mu gihugu mu gihembwe cya kabiri cy’umwaka w’amashuri wa 2025-2026.