Gakenke: Abahinzi bashishikarijwe gushyira ibihingwa mu bwishingizi hirindwa ingaruka z’ihindagurika ry’ibihe
Abahinzi bo mu Karere ka Gakenke bashishikarijwe kwitabira gahunda yo gushyira mu bwishingizi ibihingwa mu rwego rwo kwirinda ingaruka z’ihindagurika ry’ibihe, zirimo imvura inyinshi ikunze kugwa imyaka ikangizwa n’imyuzure ndetse n’isuri.
Kuri uyu wa 17 Werurwe 2026, mu Karere ka Gakenke, hatangijwe ku mugaragaro igihembwe cy’ihinga cya 2026B, igikorwa cyitabiriwe na Visi Meya ushinzwe Iterambere ry'Ubukungu, Niyonsenga Aimé François, Umuyobozi wa Polisi mu Karere, SP. Kayumba Canisius, Umuyobozi wa RAB/Sitasiyo ya Musanze, Rukundo Aimable, Abakozi b'Akarere, abafatanyabikorwa mu buhinzi n'abahinzi muri rusange.
Abahinzi bashishikarijwe gukoresha imbuto z’indobanure, ifumbire y’imvaruganda n’imborera kandi ihagije, gukoresha amakuru y’iteganyagihe, hagamijwe kongera umusaruro no guhangana n’ingaruka z’imihindagurikire y’ibihe.
Umuyobozi wa RAB/Sitasiyo ya Musanze, Rukundo Aimable yagize ati “Icya mbere nabasaba ni ukwihutisha itera, rikarangira. Mu byo duhinga, dukoreshe imvaruganda ihagije n’imborera.”
Visi Meya ushinzwe Iterambere ry'Ubukungu, Niyonsenga Aimé François yavuze ko abahinzi bakwiye gushinganisha ibihingwa nk;uko bashinganisha ubuzima.
Ati “Nk’uko umuturage wa Gakenke azirikana umwaka utaranatangira ko agomba gutanga ubwisungane mu kwivuza, niko munagomba gutekereza mbere yo guhinga, ukavuga uti ko ngiye guhinga, nzifashisha iki mu buhinzi bwanjye. Icya mbere ni ukumva ko imyaka ugomba kuyishyira mu bwishingizi.”
Ibi ngo bizafasha abahinzi cyane cyane abo mu Karere ka Gakenke gakunze kugirwaho ingaruka n’ihindagurika ry’ibihe birimo imyuzure n’inkangu byangiza imyaka, kuba bafite icyizere ko nubwo byakwangizwa n’imvura batazaviramo aho.
Gahunda y’Igihugu yo kwishingira ubuhinzi n’ubworozi (NAIS) izwi nka “Tekana Urishingiwe Muhinzi Mworozi”, igamije kurinda abahinzi n’aborozi ibihombo baterwa n’ibibazo bitabaturutseho birimo uburwayi n’ibiza.
Iyi gahunda igira uruhare rwa 40% mu kwishyura ubwishingizi, na ho umuhinzi cyangwa umworozi akiyishyurira 60% asigaye.
Muri gahunda ya leta yo kwihutisha iterambere rirambye, NST2 Leta y’u Rwanda izashora miliyoni 25$ mu guteza imbere gahunda y’ubwishingizi bw’ibihingwa n’amatungo.