Ku wa 01 Gashyantare 2025 ubwo hizihihizwaga ku nshuro ya 31, umunsi w’Intwari z’Igihugu, urubyiruko rwasabwe kurangwa n’ibikorwa n’indangagaciro byaranze Intwari z’Igihugu.

Ku rwego rw'Akarere ka Gakenke byabereye mu Murenge wa Muyongwe, ku nsanganyamatsiko iragira iti: "Ubutwari n'Ubumwe bw'Abanyarwanda, inkingi z'iterambere."

Byitabiriwe n'Abadepite barimo Hon. Judith Mukarugwiza, Hon. Mukandekezi Françoise na Hon. Bizimana Minani Deogratias, Umuyobozi w’Akarere ka Gakenke, Mukandayisenga Vestine, Visi Meya ushinzwe Iterambere ry'ubukungu, NIYONSENGA Aimé François n'ushinzwe imibereho myiza y'abaturage, Uwamahoro Marie Thérèse.

Mu kiganiro yahaye abitabiriye ibi birori, Visi Meya ushinzwe Iterambere ry'ubukungu, NIYONSENGA Aimé François yabasobanuriye ko kuba Intwari bidasaba gufata intwaro no kujya ku rugamba ahubwo buri wese ashobora kuba Intwari binyuze mu kuba Indashyikirwa, Inyangamugayo, Guharanira kugera ku cyo yiyemeje, kivamo igikorwa cy'ikirenga gifitiye abandi akamaro, Kwirinda amacakubiri n'ivangura.

Umuyobozi w'Akarere ka Gakenke, Mukandayisenga Vestine, yasabye buri wese kwisuzuma akamenya ikigero cy'ubutwari agezeho, bikamufasha gutera ikirenge mu cy'Intwari z'Igihugu, akora ibikorwa  by'Ubutwari.

Hon. Depite Judith Mukarugwiza wari umushyitsi mukuru, yabwiye abitabiriye ibi birori ko ari umwanya mwiza wo gusubiza amaso inyuma ku byaranze Intwari z'Igihugu, buri wese akagera ikirenge mu cyazo kandi umuco w'Ubutwari ugatozwa mu banyarwanda.

Muri ibi birori habayeho gahunda yo gushimira abantu bagaragaje ibikorwa by'indashyikirwa barimo umurinzi w’igihango wahawe inka. Umurenge wa Muyongwe by'umwihariko washimiwe ko watanze iyindi  kugera ku ntego wihaye mu bwizigame bwa Ejo Heza no kwishyura ubwisungane mu kwivuza ku kigero cya 100%. Ni umunsi waranzwe n’ubusabane n’umukino w’Umupira w’amaguru no gutaha ibikorwa bitandukanye byakozwe mu Karere.