Mu rwego rwo gukomeza guteza imbere ireme ry’Uburezi, kuri uyu wa Kane tariki ya 08 Gashyantare 2023,Umuyobozi w’Akarere ka Gakenke Bwana Nizeyimana Jean Marie Vianney ari kumwe na Madamu Nancy Del col uyoboye itsinda riturutse muri World Vision Canada bashyikirije impamyabumenyi ku barimu 51 bigisha ururimi rw'icyongereza icyiciro cya mbere cy'amashuri abanza hakoreshejwe ikoranabuhanga.

Umuyobozi w’Akarere ka Gakenke Bwana Nizeyimana Jean Marie Vianney, yashimiye itsinda riturutse muri World Vision Canada ku bufatanye bakomeje kugaragaza mu guteza imbere ireme ry’uburezi,asaba abayobozi b’ibigo gukomeza gukoresha iryo koranabuhanga bigisha icyongereza anasaba abarimu bahuguwe gufasha bagenzi babo.

Madamu Nancy Del col uyoboye itsinda riturutse muri World Vision Canada yashimiye abarimu bahuguwe bakanahabwa impamyabumenyi (Certificat) uburyo bigisha abana, abizeza gukomeza kubaba hafi no kuzabafasha kubona ibikoresho by’ikoranabuhanga bibafasha kwigisha ururimi rw’icyongereza.

Hakizimana Lambert, umwarimu wigisha mu mwaka wa kabiri mu mashuri abanza kuri GS Kirebe mu Murenge wa Karambo avuga ko mbere yuko uyu mushinga uza KIX (Knowledge and  innovation exchange) batangiye  bakoreshaga ibitabo bifasha abana kumenya amagambo y’icyongereza ariko aho uyumushinga uziye wo kwigisha abana hakoreshejwe ikoranabuhanga byazanye impinduka .

Yakomeje avuga kandi ko mbere bakoreshaga tablet bakayisanisha na telefoni bakoresha iwabo mu rugo byakarusho aho baboneye imashini za Laptop bishimiye ikoreshwa ry’ikoranabuhanga.

Hakizimana Lambert yasobanuye kandi  ko mbere yuko KIX iza atarazi gukoresha ikoranabuhanga  ariko uyu mushinga utangiye aragira  ati “ Hari ibyo nize bimfasha gukora akazi ka buri munsi cyane cyane nko gukoreshe projecter,zoom baganira n’aba nya Canada, Kenya ndetse no mu gihugu cy’u Rwanda”.

Yashimiye World Vision Rwanda kubufatanye n’Akarere ka Gakenke uruhare bagize  kugira ngo bunguke ubwenge bufasha abana bigisha  mu mashuri abanza (P1,P2,P3).

Gikwerere Patrick