Abakandida biyamamariza guhagararira Intara y’Amajyaruguru mu Nteko Ishinga Amategeko, Umutwe wa Sena bahawe ikaze mu Karere ka Gakenke, basabwa gufasha Intara y’Amajyaruguru by’umwihariko aka Karere mu kuzamura iterambere n’imibereho myiza y’Abaturage bifashishije ubunararibonye bafite.

Ku wa 05 Nzeri 2024 nibwo Abakandida batatu bifuza guhagararira Intara y’Amajyaruguru mu Nteko Ishinga Amategeko Umutwe wa Sena, biyamamarije imbere y’Inteko Itora y’Akarere ka Gakenke.

Abo bakandida ni Amb Rugira Amandin,  Dr Nyinawamwiza Laetitia na Dr Gatera Jean d’Amour.

Buri wese yahawe umwanya wo kwibwira Inteko Itora no kuyigezaho imigabo n’imigambi afitiye abanyarwanda, by’umwihariko Akarere ka Gakenke n’Intara y’Amajyaruguru.

Umuyobozi w’Akarere ka Gakenke, Madame Mukandayisenga Vestine, yashimiye abakandida bafashe umwanya wabo bakaza kugeza ku nteko itora, imigabo n’imigambi bafitiye Abanyarwanda ndetse n’abagize inteko itora baje kubatega amatwi.

Madame Mukandayisenga yavuze ko bitewe n’imirimo itandukanye abakandida bagiye bakora, uburambe n’ubunararibonye bafite bigoye kugira uwo wavuga ko atahagararira Abanyarwanda neza mu Nteko Ishinga Amategako Umutwe wa Sena.

Guverineri w’Intara y’Amajyaruguru, Bwana Mugabowagahunde Maurice, yavuze ko Intara y’Amajyaruguru by’umwihariko Akarere ka Gakenke biteze byinshi kuri aba bakandida biyamamariza kuyihagararira muri Sena.

Ati “Turifuza ko na nyuma y’ibi bikorwa bose uko ari batatu bazakomeza kuba hafi Intara yacu by’umwihariko Akarere ka Gakenke, tugakomeza tukungukira ku burambe n’ubunararibonye bafite, bakadufasha mu rugendo rwo gukomeza gutera imbere twese twihuse.”

Guverineri Mugabowagahunde yavuze ko aba bakandida bafite ibigwi mu rwego rw’ubuhinzi kandi rukaba rufatiye runini Akarere ka Gakenke. Bafite kandi ubunararibonye mu uburezi, imiyoborere no mu bukungu biri mu nkingi y’iterambere ry’abaturage.

Amatora y’abagize Inteko Ishinga Amategeko Umutwe wa Sena azaba taliki ya 16 Nzeri 2024.

Sena y’u Rwanda igizwe n’Abasenateri 26 bamara manda y’imyaka itanu, yongerwa rimwe gusa kandi nibura 30 ku ijana bagomba kuba ari abagore.

Muri bo 12 batorwa n’inzego zihariye hakurikijwe Inzego z’imitegekere y’igihugu, umunani bashyirwaho na Perezida wa Repubulika na bane bagashyirwaho n’Ihuriro ry’Igihugu nyunguranabitekerezo ry’Imitwe ya politiki.

Ni mu gihe umwe atorwa mu barimu cyangwa abashakashatsi bo muri kaminuza no mu mashuri makuru bya Leta, mu gihe undi atorwa mu barimu cyangwa abashakashatsi bo muri kaminuza no mu mashuri makuru yigenga.

Umwanditsi: Evariste Nsengimana