Ku wa 15 Werurwe 2025, Abajyanama mu Nama Njyanama y'Akarere ka Gakenke bakomereje icyumweru cy'Umujyanama mu Murenge wa Janja.

Ni gahunda yo kwegera abaturage hagamijwe kubaganiriza ibikubiye mu cyiciro cya kabiri cya gahunda ya Guverinoma (NST2) n'imihigo y'Akarere y'Umwaka w'Ingengo y'Imari wa 2024/2025. Biteganyijwe izakorerwa mu Mirenge ya Muhondo, Muzo, Janja na Busengo.

Nyuma y’Umurenge wa Muhondo iki cyumweru cyatangirijwemo, bakurikijeho uwa Janja, basura ibikorwa by'Umushinga ProPoor Basket Fund, byo gusana ibyumba by'amashuri ku ishuri ribanza rya Karama n'ikigo Nderabuzima cya Rutake.

Basuye kandi inzu ya Musabemariya Primitive wo mu Kagari ka Karukungu iri gusanwa muri Gahunda zo gukemura ibabazo bibangamiye imibereho myiza y'abaturage.

Bagiranye ibiganiro n'urwego rw'Umurenge wa Janja (Inama Njyanama n'Abanyamabanga  Nshingwabikorwa n'izindi nzego zihagarariye abaturage), babagezaho imishinga y'Iterambere Akarere gafite  bifuza ko nabo bayigiramo uruhare.

Mu mishinga bagaragarijwe harimo iyo Kubaka Sitasiyo za Lisansi, Inganda zirimo urutunganya imyenda mu bisigazwa by’inanasi, gutunganya ahantu nyaburanga [Umusozi wa Kabuye ukunzwe n’abakerarugendo], Gutunganya ahacururizwa Kawa ya Gakenke, imaze kubaka izina mu bwiza n’uburyohe.

Abajyanama mu Nama Njyanama y’Akarere basoreje uruzinduko mu nteko n'Abaturage b'Akagari ka Karukungu, aho baganiriye kuri gahunda zitandukanye za Leta. Banahawe umwanya wo gutanga ibitekerezo, ibyifuzo n'ibibazo bifuza ko Abagize Inama Njyanama y'Akarere babakoreraho ubuvugizi, bikihutisha iterambere.

Muri rusange mu cyumweru cy'Umujyanama hazakorwa ibikorwa birimo:

●Kwakira ibibazo by'Abaturage kugira ngo bafatanyirize hamwe kubishakira ibisubizo.

●Bazanifatanya nabo muri gahunda za Leta zitandukanye nk'Umuganda rusange, Inteko rusange y'Abaturage n'ibindi.

●Gusura ibikorwa by'imihigo biri mu Mirenge,

●Gusuzuma imitangire ya Serivisi mu Mirenge

●Kuganira n'urwego rw'Umurenge(Inama Njyanama n'Abanyamabanga Nshingwabikorwa)

●Ibiganiro n'Abahagarariye abaturage