Mu rwego rwo gukomeza kunoza umurimo w’ubworozi hakoreshejwe ikoranabuhanga, Kuri uyu wa mbere tariki ya 28/08/2023, Umuyobozi w'Akarere ka Gakenke w'Agateganyo  Bwana Niyonsenga Aimé François ari kumwe n'Umufatanyabikorwa wa  Orora Wihaze yashikirije Smart Phone ku banjyanama b'ubworozi bagera kuri 50 n'abavuzi b’amatungo 10, hagamijwe kuborohereza kuzuza inshingano zabo za buri munsi zo  kugeza service inoze ku borozi.

Umuyobozi w'Akarere ka Gakenke w'Agateganyo yasabye abanjyanama b'ubworozi kubyaza umusaruro Telephone bahawe, kunoza inshingano zabo no gukomeza gusigasira Ubumwe bw'Abanyarwanda.

Yakomeje asaba abanjyanama b’ubworozi ko bakwegera abaturage bityo abaturage bakabisanzuraho, ufite ikibazo akakivuga kugira ngo ubworozi bukomeze gutera imbere mu Karere ka Gakenke. Yababwiye kandi ko ikoranabuhanga begerejwe ryabafasha kwihutisha serivisi.

Abajyanama b’ubworozi basabwe kandi kwigisha aborozi ikigero cy’uko itungo rigomba kugaburirwa,guhabwa ubwatsi buhagije n’amazi hanyuma rigatanga umusaruro w’amata uhagije.

Abaturage n’aborozi muri rusange bashishikarijwe kuzamura umukamo w’amata mu rwego rwego rwo kurwanya imirire mibi n’igwingira ry’abana bato ndetse no kubona amafaranga.

Nizeyimana Benjamin, Umuyobozi w’umushinga Orora Wihanze mu Ntara y’Amajyaruguru, avuga ko uyu munsi habaye igikorwa cyo gushikiriza Smart Phone abanjyanama b’ubworozi begera kuri 50 ndetse n'abavuzi bamatungo 10, bahuguwe hagamijwe kubongerera ubumenyi mu bijyanye n’ubworozi ndetse no kongera umusaruro w’ibikomoka  ku matungo kugira ngo nabo bajye kubisangiza aborozi bagenzi babo.

Yakomeje avuga ko bahawe Telephone zigezweho hagamijwe kuborohereza mu bikorwa byabo bya buri munsi, kubona amakuru, kuyageza kuri bagenzi babo, kugera ku  nzengo zitandukanye baba bakeneye mu bikorwa byabo bya buri munsi.

Nimukuze Deliva, Umujyana w’amatutungo mu Murenge wa Karambo avuga ko iyi Telephone yahawe igiye kumufasha guhanahana amakuru hagati yabo n’abavuzi b’amatungo ( Veterinaire) kugira ngo barusheho gutanga serivisi inoze ku baturage.

Akimanizanye Specioze avuga ko Telephone yahawe igiye kumufasha kugira ngo abone itumanaho rimworoheye no kugira inama abaturage.

Gikwerere Patrick